Pulsa no seguinte enlace para descargar a Folla Parroquial.

FOLLA PARROQUIAL

 

 

 

Da obediencia á conversión

Como cada domingo, a comunidade parroquial reúnese para deixarse interpelar pola Palabra de Deus. Nesta ocasión, o Evanxeo sitúanos no corazón do Sermón da Montaña, onde Xesús convida aos seus seguidores a ir máis aló da simple observancia de normas. Non se trata de sumar preceptos, senón de abrirse á acción transformadora do amor do Pai.

A escena non transcorre no solemne Templo de Xerusalén, senón nunha montaña de Galilea. O paralelismo co monte Sinaí é inevitable: alí Moisés recibiu a lei como garantía de supervivencia para o pobo, establecendo os mínimos éticos para a convivencia. Pero agora é Xesús, o Fillo, quen toma a palabra. Non fala en nome dun Deus afastado e lexislador, senón do Abbá, o Pai próximo que nos chama a unha relación familiar e non a un contrato legal. Xesús non dita leis; propón un estilo de vida. Non interpreta parágrafos antigos; ensínanos un camiño de fraternidade trazado con xestos e palabras que cheiran a Evanxeo.